Pagoeta M.E.

Bazkide hori:

Honekin batera doakizu uztailaren 16-17 astebururako antolatu dugun Gouretterako irteeraren informazioa duzu.

www.pagoeta.eus webgunean, ibilaldiaren mapa, track-ak eta irteeren azalpena dituzu. Irteera erraz eta politak dira, eta Gourette estazioan egingo dugu lo.  Animatu, plan bikaina dugu eta.
Izena emateko bi aukera daude:

• Pagoeta Mendizale Elkartean.Egunak: ekainaren 23tik uztailaren 8ra, 20:00etatik 21:00etara.
• Elkartearen helbide elektronikora idaztea (pagoetame@gmail.com), norberaren datuak emanez eta ordainagiriaren dokumentua erantsiz. Ekainaren 24tik aurrera jasotako mezuak soilik onartuko dira.

Derrigorrezkoa da FEDERATUA izatea. Federatua ez bazaude, aukera duzu irteerarako asegurua egiteko. Horretarako, izen-abizenak, jaioteguna eta NAN zenbakia behar dizkiguzu, eta 10 € gehiago ordaindu.

Animatu!!!
Batzordea

Baldintzak

Download “Uztailak 16: Gabizos”

Download “Uztailak 17: Ger”

Bazkide hori:

Honekin batera doakizun fitxategian, ekainaren 18-19 astebururako antolatu dugun Otxagabirako irteeraren informazioa duzu.
Izena emateko bi aukera daude:

• Pagoeta Mendizale Elkartean egitea.Egunak:  Maiatzaren 26tik ekainaren   9a bitarte . Ordutegia: 20:00tik 21:00ra.

• Elkartearen helbide elektronikora idaztea (pagoetame@gmail.com), norberaren datuak emanez eta ordainagiriaren dokumentua erantsiz. Maiatzaren 26tik ekainaren  13ra bitarte jasotako mezuak soilik onartuko dira.

Larrañeko bortua – Orhi  – Musumurru – Iratiko etxeak

Ibilbide-zeharkaldi honi hasiera, Larrañeko bortutik edo eta Iturzaeta mendatetik emango diogu. Tunela pasa eta metro batzuetara dagoen aparkalekuan utziko dugu autobusa.
Guk, Orhira doan bidezidor zapaldu eta nabarmena hartuko dugu. Goizeko freskuran, konturatzerako izango gara tontorrean. Bertatik ikusten den ikusmira, alimalekoa da. Orhi da, Kantauri itxasotik gatozela, bi mila metrotik gora altxatzen den lehen tontorra. Hemendik hegoaldera, Muxumurru eta urtegi txiki bat izango ditugu begi-bistan eta bertara zuzenduko ditugu gure pausoak. Bertatik eskuinera egin eta metro batzuetan GR12-ari jarraituko diogu.
Geroxeago ordea, bide hau utzi eta Iratiko oihanean sartuko gara. Hemendik aurrera, pago eta izei ederren artean joango gara.  Lasaitasuna ia erabatekoa da. Txoriren baten txorrotxioak hausten du tarteka isiltasuna. Bidea markatua dago gezi urdin eta ia ezabaturiko marka horiekin. Erne joan beharko dugu marka hauek ez galtzen. Izan ere jende gutxi dabil paraje hauetan eta behin baino gehiagotan orbelak estaltzen du, guk egin beharreko bidea. Eta honela Elurretako Andra Mariren baselizara iritsiko gara. 1954ean inauguratu zuten Aezkoa eta Zaraitzuko bizilagunek. Hemendik behera Iratiko Etxeetan garagardo hotz bat hartu eta berehala helduko gara autobusa dagoen tokira.

Otsagabia – Itzaltzu – Gartxoten ibilbidea + Abodi

Otsagabiako kanpinean emango diogu hasiera ibilbide honi. Zaraitzu ibaian gora, Zatoia eta Anduña errekek bat egiten duten puntuan sartuko gara Otsagabiako herri eder honetan.
Eskuinera hartu eta zubia zeharkatuko dugu.

 Errekaren aldamenetik, ”estación patatera” delakora iritsiko gara eta hemen, panel informatibo batek, Otsagabia eta Itzaltzu arteko herri bidearen berri emango digu.

Herriaren irteeran, erdi ezkutuan dagoen zutabe batek emango digu hartu beharreko norabidea. Hasieran hurrondo artean joango gara; bidean aurrera egin ahala, pago, pinu eta izei artean, baso laiotzean sartuko gara. Urte sasoiaren arabera, errekasto batzuk ere pasako ditugu ur gehiago edo gutxiagorekin.

Egurrezko zubi bat pasa eta Itzaltzura iritsiko gara.  Gartxoten bidea hementxe hasten da

Errepidez, kilometro pasatxo egin beharko dugu, Izaba aldera doan bidean.
Errepidearen ezkerretara dagoen egurrezko zutabe batek, Elkorreta-Gatxot jarriko digu, eta bide-zidorrean gora egingo dugu, marka laranja eta txuriei jarraituz. Pixkanaka aldapa eramangarrian, ezpel, pago, astigar eta elorri zuri artean, errez egingo dugu gora. Zelai gune eta larre ederretara iritsiko gara eta ekialdera begiratuz, Euskal Pirinioak ikusiko ditugu. Argazki batzuk atera ondoren, Elkorreta aldera hartuko dugu baina gure asmoa Abodira ere igotzea denez, bueltakoan bisitatuko dugu Elkorretako haitzuloa.
Abodi gainetik ere ikusmira ederraz gozatuko dugu. Orhi mendia ikusiko dugu parez pare. Larre motzean behera errekatxo bat pasa, basoan sartu eta igoeratxo baten ondoren, Elkorretara iritsiko gara.
Gartxoten kondaira, ahoz aho iritsi zen gureganaino, 1935ean Arturo Kanpionek
Itzaltzuko bardoa liburua idatzi zuen arte. Gero Benito Lertxundik kanta bat eskaini zion Gartxoti.

Beste bultzada haundi bat, Asisko Urmenetak eman zion marrazki bizidunen bidez.
2008tik aurrera Urtarrileko bigarren aste bukaeran, Gartxoten eguna ospatzen da Itzaltzun. Euskaltzale askoren zita garrantzitsua izaten da. Elkorretako haitzuloan kontatuko dizuegu Gartxoten kondaira. Hunkigarria benetan!!

Berriz ere bueltan, marka txuri- laranjei jarraituz, Benito Lertxundiren kantaren bat abestuz, Itzaltzura jaitsiko gara ibilbidea amaituz.

Ondo izan, eta animatu!

Bestalde arkamurkak prestatu duen astearen informazio duzue esteka honetan:
https://arkamurkanaturtaldea.blogspot.com/2022/05/zarauzko-xxiv-astronomia-astea.html
Eta beste esteka honetan larunbat honetan Zarautzen antolatu duten irteera botanikoaren berri.

https://arkamurkanaturtaldea.blogspot.com/2022/05/irteera-botanikoa-zarautzen-baso.htmlBatzordea

Otxagabia-ekainak-18-19 baldintzak

Ibilbidea Albiko soilguneetatik egingo dugu, aparkalekuaren amaieran Santutegirako norabidean; eskuinetara langa berde bat ikusiko dugu, pista zabal batera sartzeko. Pista hori ondo zehaztuta dago, eta pixkanaka Aralarko basoaren loditasunean sartuko gara; lehenik, borda txiki baten ondotik igaroko gara; aurrerago, ezkerretara, bidezidor txiki bat ikusiko dugu (handik itzuliko gara). Handik gutxira, lau bideko bidegurutze batera iritsiko gara, eta, hara iritsi ahala, ezkerreko bidea hartuko dugu; garrantzitsua da bidegurutze horretan kontuz ibiltzea itzultzean, oso erraza da despistatzea eta zuzen jarraitzea.

Bide hori hartzen dugunean, estuagoa eta margo gorriz markatua, altuera irabazten hasiko gara; aldapa ertainetik eta harri askeko lur deserosotik. Lehen igoera horren ondoren, soilgune zabal batera iritsiko gara; han, nahiko zapalduta dagoen bidezidorretik, lur belartsu eta lau baten gainean, ibilbideari jarraituko diogu, kaputxinoaren lapida zahar baten ondotik pasatuz, eremu harritsu baterantz. Alde harritsua zeharkatuko dugu marra gorriei jarraituz, eta ondoren soilgune berri batera irtengo gara, Bustinza borda zaharra ikusiko dugu, eta  bere aldamenetik igaro ondoren, amildegi baten ibilbideari paraleloan jarraituko dugu; Belokiren magalaren azpitik irtengo gara, eta aurrean bi lepo txiki. Amildegiaren bideari jarraituko diogu, eta eskuinaldeko lepora igoko gara; Aralarko muino  eta Malloak aurrean ditugula.

Hemendik jaisten joango gara pista zabal baten oinatzak aurkitu arte. Bertara iristean, ezkerretara hartuko dugu eta GR20ko balizei jarraituko diegu ia lur lauetatik, Unagako Putzura iritsi arte. Putzura iristean, pistak eskuinera biraraziko gaitu, eta gure igoerari jarraituko diogu.

Orain, bidexka lauso bati jarraituko diogu, harkaitzez jositako lursail batetik; lehenengo une horietan, Malloetako gailurrak hartuko ditugu erreferentziatzat, harik eta arrasto gorriak dituen bidezidor bat aurkitu arte. Inolako galerarik gabe, margo gorriz balizatutako bidezidorrari jarraituko diogu, oso lur harritsuan eta malda ertainetan gora eginez; 200 metroko desnibela gainditu ondoren, Beldarri mendiaren azpiko Malloetako gailurrean utziko gaitu, Irumugarrietako gailurra ikusten dugun lekuan. Muino txiki bat igaro eta alanbre-hesi bat zeharkatuko dugu; eta azken 100 metroko desnibela gainditzea besterik ez zaigu geratuko, Malloetako gailurrik garaienera iritsi arte; Irumugarrietaraino, 1431 metroko altuerarekin.

Jaisteko, ezkerrera doan bidea utziko dugu, marra gorriei jarraituz, apur bat zapaldutako bide batetik, alanbre-hesi baten parera iritsi arte; alanbre-hesi bat zeharkatu beharko dugu, eta errazena, eskuinean dagoen «mugarri» batetik barrena joatea da. Alanbre-hesia igaro eta metro gutxi batzuk behera egin ondoren, informazio-zutoin bat duen bidegurutze batera iritsiko gara; Irumugarrietako tontorrerantz seinalatzen digun geziaren kontrako norabidean jarraitu beharko dugu. Beheranzko bideari jarraituko diogu, bidexka-arrasto lausoak, mugarriren bat eta marka gorriak jarraituz; eta 200 metroko jaitsieraren ondoren, Aralarko arrasetako pistara iritsiko gara berriro, GR markekin.

Pistatik jarraituko dugu, Errenagako Putzua ondotik igarota. Handik gutxira, Igaratzara jaitsiko gara, eta han, bere bi babeslekuen eta bere ermitaren ondotik igaroko gara, eta leku enblematiko horretatik GR jarraituko dugu, lautada zabal batera iritsi arte. Han, eskuinera joko dugu, GRaren arrastoei jarraituz, eta informazio-zutoin baten eta Guardetxe aldera doan pista baten ondora iritsiko gara. Pista hori Guardetxerantz hartuko dugu, pixkanaka landaretza trinkoaren artean sartuko gara, kilometro erdi baten ondoren Desamendiko leize erraldoira iritsiko gara; handik kilometro erdi bat aurrerago, bidegurutze batera iritsiko gara, eta han ezkerrera egingo dugu, eta oraindik pixka bat gehiago jarraituko dugu pistatik, Pagomariko aparkaleku zaharrera iritsi arte.

Pagomarira iristean, ezkerreko gune hormatuan sartuko gara, eta pista bat hartu arte zeharkatuko dugu; pista hori hartu, eta norabidea aldaraziko digu ezkerrerantz, eta aldapa txiki bat igoaraziko dugu, zulo txiki batera iritsiz. Hemen pista utziko dugu, zuhaitzen azpiko eskuinaldetik zuloa inguratzen duen bidexka bat hartzeko, eta berriro ere pistan sartuko gara; hortik behera egingo dugu pixkanaka bidegurutze batera iritsi arte. Han, ezkerrerantz joko dugu, eta pista betean pauso batzuk egin ondoren, bidezidor estu bat hartuko dugu. Bide horretan behera jarraituko dugu, nahiko zapalduta eta galbiderik gabe; alboetan beste bidexkaren bat aurkituko dugun arren, pasatzen utzi beharko dugu. Hustubide baten ondotik igaroko gara, kilometro erdi falta zaigula adieraziz, hasieran Albiko zabal-gunera hartuko dugun pistara irten arte. Eta bide ezagunetik, aurrera egingo dugu Albiko zabalgunean amaitu arte.

Kaixo.

Maiatzak 12an, osteguna-19;00etan, Zarauzko Modelo aretoan izango den dokumental-solasaldian, azken urteotan, iskanbila-iturri bihurtu den Aralar izango degu hizpide. Bertako larreen kudeaketa gatazkatsua izaten ari da, ganaduzaleen esanak aintzat hartzen baditugu, bederen. Baina, haienak ez dira ahots bakarrak. Aralar parke naturala da eta bertako ondare naturalaren eta biodibertsitatearen zaintzaz arduratuta, Aloña Jauregi eta Garazi Auzmendiren laguntzaz Aralar, mundua leku den lurra ikus-entzunezkoan parte-hartze zuzena izan zuen Landarlan elkartearen ikuspegia ekarri nahi izan dugu Modelo zinemara. Beraz herritar guziak bertan parte hartzera gonbidatuta zaudete.

https://arkamurkanaturtaldea.blogspot.com/2022/05/zer-ari-da-gertatzen-aralarren-hitzaldi.html

Arkamurka natura elkarteak hegaztiak ikusteko irteera antolatu du Iñurritza biotopora. Hitzordua maiatzaren 1ean, igandean, goizeko 09;00 etan, Zarauzko surtidorearen aurreko biotopoaren sarreran izango da. Udaberri betean sartuta gauden garaia izanik,  hegazti ugari ikusiko ditugula zihurtatua dago, kontuan izan udaberria Iñurritza biotopoan hegaztiak ikusteko urteko sasoirik onena izaten dela. Batzuk Afrika aldetik Iñurritzako hezegunera kumatzera etortzen direlako eta beste batzuk migrazioan Iñurritza biotopoa atseden hartzeko erabiltzen dutelako. Inongo zailtasunik izango ez duen goizbuelta bat izango da. Arkamurka taldekoek teleskopioak, prismatikoak zein hegazti gidak eramango dituzte, bainan halata guztiz norberak ere etxean izango balitu eramatea gomendatzen da. Beraz, txorizale guziak bertan parte hartzera gonbidatuta zaudete. Behekaldean dituzue egun hauetan bertan ikusten ari garen hegazti batzuen argazkiak.

Autobusak “El Mirador de Salburua” jatetxean utziko gaitu. Hau izango da gure bazkaltzeko tokia.

 Bertatik Salburuako Parkea “ATARIA”ra joango gara, eta bertan hasiko dugu ibilbidea (Salburuako Hezegunea Interpretazio Zentroa). Oreinak, ahate desberdinak, zikoinak etab. ikusteko aukera izango dugu. Merezi du buelta osoa egitea. Gainera, dena laua da. 

4 km-tara Elorriaga auzoan geldituko gara. Aukera dago autobusa hartzeko bertan, norbaitek beharra badu. Parkean zerbait jan dezakegu eta gero nahi badugu kafetxo bat “Palacio de Elorriagan” har dezakegu, baina ezin da gure janaria eraman.

Buelta osoa  9,300 km dira.

Jatetxea beteta egongo da eta aholkatu digute  ordubitan (14:00) eserita egoteko.

Arratsaldeon.

  Martxoak 31, osteguna-19;00etan, Zarauzko Modelo aretoan izango den dokumental-solasaldi honetan parte hartzera gonbidatua zaudete. Bertan AZTI ren eskutik “klima aldaketa Euskal herrian; Itsas mailaren igoera” izenburua duen bideo dokumentaldi bat eskainiko da. Bideo honetan klima-aldagaiekiko erantzun fisiko eta biologikoen seinaleen joerak aztertu dituzte euskal itsasertzean eta estuarioetan.

  Guk baino hobeto jakingo duzuenez, Zarautzek lehorretik zein itsasotik, berebiziko arrisku hidrologikoak ditu: batetik, herria paduraren gainean eraikita dagoelako eta bestetik, Jaurlaritzak berak seinalatu duelako Zarautz, itsas mailaren igoeren eszenatokietan kalte handienetarikoa jasoko lukeen herri gisa. Hala ere, Udalak ez ditu arrisku hauek jasota indarrean dagoen Hirigintza Plan Orokorrean. Bestalde, herritarrak bizkarra emanda bizi gara errealitate honi. 

  Bideo dokumentaldiaren ondoren Klima aldaketan aditua den Elisa Sainz de Murietari emango diogu hitza. Berak urteak daramatza BC3 n  (Basque center for climate change) klima aldaketaren ondorioak aztertzen, besteak beste itsas mailaren igoerak ekonomian izango lukeen inpaktuaz. Ondoren, solasalditxoari emango diogu paso entzulegoa parte hartzera gonbidatuz.

  Jakina da Klima-aldaketa eta hark eragiten duen itsas mailaren igoera mundu osoko arazoak direla, eta denoi eragiten digutela.  Zientziaren helburuetako bat da etengabeko igoera horren arrazoiak eta ondorioak aztertzea. Mareografoen neurketek erakusten dutenez, 1950etik, Itsasoaren batez besteko Maila (IBbM) 1,8 mm igotzen ari da urtero.Bertan ikusiko geralakoan, ongi izan.

https://arkamurkanaturtaldea.blogspot.com/2022/03/dokumental-solasaldia-klima-aldaketaren.html

Itzaga Haitza, mendizaleen artean, eta batez ere nafarren artean oso ezaguna den tontorra da. Zalantzarik gabe, Nafarroako mendi enblematikoetako bat da. 1360 metroko garaierarekin, Pirinio-aurreko arroen eremuko altuena da.

Iruñetik gertu dagoenez eta bertako paisaia kontutan izanik, bisitari gehien iristen denetako bat  da. Bere tontorretik ikusten diren panoramikak direla eta, Nafarroako Pirinioak ikusteko ederrenetako bat dela esan daiteke. Nafarroa osoa hartzen du bere erpin geodesikotik. Lau komunitateko mendiak ikusten dira talaia ikusgarri honetatik. Nafarroako, Aragoiko, Euskal Herriko eta Gaztela-Leongo lurrak ikusiko ditugu eguraldia lagun. Itzagak, bere azpian zabaltzen den bailara bati izena ematen dio: Itzagaondoa. Gailurretik gertu San Migel ermita dago, erromanikoa, eta inguruko haranetako biztanleak oraindik erromerian igotzen dira bertara. Maiatzaren hirugarren igandean ospatu ohi da

Mendilerro hau. Itzagaondoa eta Untzitibar bailaren arteko banalerroa ere bada.

Eguneko txangoa: Ardanatz – San Migel baseliza – Itzaga Haitza – Ganbela – Santagata – Altzorritz

Ardanatzko herriskaren goialdetik hasten den bide zabalean gora ekingo diogu txangoari helburu dugun gailurra goian dugula. 

Handik gutxira, eskuinera hartu mendirantz, suebaki baten antzeko malda gogor batean gora, basoan barrena doan bide zabal bat, besterik aipatu gabe. Ezkerrean ateratzen den bidezidor batek bidea mozteko aukera ematen digu bidegurutze batera iritsi arte.   

Bidea, 850 metroko altueratik aurrera, leundu eta estutu egiten da Itzagako harresi harritsu bertikalen azpian egingo dugun ibilbidearen unerik estetikoenean, basoa, ezpela, eta pagoen artean zeharkatuko  dugu monolito bitxiekin batera trazadura marrazten dutela. Horrela, “Sarrioen pasabidea” deitzen den gunera iritsiz,  (940 m.) horrela, eremu harritsua zeharkatzea ahalbidetzen du, hegal monolito batzuk eta harana ikusten diren bitartean.

Bidezidorra belardi batean amaitzen da, eta, ondoren, ezpel eta pagozko tunel bitxi batzuetan sartzen da. Malda gogorra leundu egiten da berriro, San Migel ermitaren  kokagunera hurbildu arte. XI. mendeko eraikin ederra da, oso ondo kontserbatua.

Hemendik gora jarraituz berehala iritsiko gara Itzaga Haitza gailurrera (1360mn.) Talaia honetatik dagoen paisaiaz begiak gozatu ondoren, eta gainez-gain jarraituz lehenik Ganbela (1254 m) muinoa eta jarraian  Santa Agata  edo Santagata (1.204 m) muinoetatik igaroko gara. Gain honetan,  burdin garaiko kastro bat aurkitzen da

Ondoren, beherako bideari lotuko gatzaizkio, zenbait gunetan bidea nahiko garbia izango dugu, eta beste batzuetan ezpel artean doan zidorretik igaroaz egingo dugu, hau da;  beti ez dela oso garbia izango.

Amaierara  gerturatzen goazen heinean, bide zabal eta garbia izango dugu.  Horrela iritsiko gara Untzitibar bailaran aurkitzen den Altzorritz herriska politera

Ibilaldi hau egitean, ingurune eder bat ezagutzeko aukera izango dugu, eta aldi berean paisaia zabalaz gozatzeko ere bai.

Distantzia:  16 km. inguru

Igoera / jaitsiera metatuak.  960 m. inguru

Denbora:  5:30 ordu inguru

Zailtasuna:  Ertaina,  eta ez du zailtasun teknikorik

Gehienok GUARA ko mendi- zerra neoprenoz ezagutu dugu. Izena du Europa mailan harroilak jeistea gustoko dutenen artean. Baita eskalatzea edo espeleogia gustoko dutenen artean.
Kataloina-ko Cadírekin batera Aurrepiriniotako mendizerra famatuena dugu Guara. Lehor itxurakoa da lehen hurbilduan, baina milaka urteeetan urak harrotu du mendia eta ebaki sakonez josita dauka azala.
Urak harrian egindako lanak dira Guarako ezaugarri nagusiena. Baina bada Guarako Mendizerran beste protagonista bat: gizakia. Gizakiaren arrastoa etengabe aurkituko dugu, bai aintzinakoa, hormetako margoak eta trikuharriak esatebaterako, baita berrixeagoak, zubi zaharrak, utzitako herriak, leku ixkutuenetan erakitako ermita eremitak, eta Alquézar eta Rodellar bezalako herri ederrak.
Mendigoizaleari egiten diogun proposamena Guarako mendizerraren barruetara, bere harroila sakonetara, bidezidor zaharretatik barrena hurbiltzea da. Harria eta ura gustokoa dutenen artean hain ezagunak diren parajeetan galduko gara: Mascun, Alcanadre, Rio Vero eta Vadiello. Gailurretara ere bixitatxoa egingo dugu, Tozal de Guara ondoko Fraginetoko krestara eta Peña Amán eta Peña San Miguel, konglomeratuzko monolito ikusgarrietara.
Hainbat sektore ezberdin ezagutuko ditugu. Lau sektore hauek lau ibai nagusiei lotuak daude, Flumen, Guatizalema, Alcanadre eta Vero. Beti ere 450 eta 1700 m artean ibiliko gara. Ibilaldi bakarra da fisikoki eskakizun handikoa, Fraginetokoa hain zuzen, 1200 metroko desnibela eta 7-8 ordu ingurukoa. Beste ibilaldiak ez dira hain luzeak, 4 ta 7 ordu tarteakoak, baina inguruaren orografia konplexua da eta bideak maiz pikak, bai gora eta baita behera.
PLISTI-PLASTA eta beste ohartxoak motxila prestatzeko orduan
Prestatu ditugun hainbat ibilaldietan harroilak gurutzatu behar ditugu. Maiz zubi bikainetatik, beste batzutan, uretan sartu beharko gara, beharbada baita belaunetaraino ere.
Bestetik Guarako landaredia mediterranearra da. Badakizue, arantza ugari, beraz eguraldia ona denean ere galtza luzeak komeni. Bai ostegunean eta bai astelehenean, joaterakoan eta itzultzerakoan txango motzak prestatu ditugu, 3-4 ordutakoak

Aprililak 14: Val de Onsera

10 km inguruko ibiladia izango da eta 800m inguruko desnibela dauka

Apirilak 15: PEÑA AMAN (1121m) eta PEÑA SAN MIGUEL (1126 m)

20 Km inguru eta 1050m-ko desnibela dauzka

Apirilak 16:   FRAGINETO (1746m)

Ibilaldiak 24 Km inguru eta desnibela berriz 1250m ingurukoa edukiko du

Apirilak 17:  MASCUN

2 aukera: A aukera 20km eta 1000m inguruko desnibela eta B aukera 15km inguru 800m-ko desnibela

Apirilak 18:   RIO VERO

10km eta 400m ko desnibela